Exo 10 | NdeIBE | STEP | Ngakho uJehova wasesithi kuMosi, “Hamba kuFaro, ngoba sengiyenze yaba lukhuni inhliziyo yakhe lezinhliziyo zezikhulu zakhe ukuze ngenze izimanga zami kubo

Exodus 10

Uhlupho lwezintethe

1 Ngakho uJehova wasesithi kuMosi, “Hamba kuFaro, ngoba sengiyenze yaba lukhuni inhliziyo yakhe lezinhliziyo zezikhulu zakhe ukuze ngenze izimanga zami kubo 2 ukuze lilandisele abantwabenu labazukulu ukuthi ngabahlukuluza njani abeGibhithe lokuthi ngabenzela izimanga, khona lizakwazi ukuthi mina nginguJehova.”

3 Ngakho oMosi lo-Aroni baya kuFaro bathi kuye, “Nanku okutshiwo nguJehova, uNkulunkulu wamaHebheru: ‘Uzakwala kuze kube nini ukuzithoba phambi kwami? Yekela abantu bami bahambe ukuze bayongikhonza.

4 Uma usala ukuthi bahambe ngizaletha izintethe elizweni lakho kusasa.

5 Zizakwembesa wonke umhlabathi usale ungasabonakali. Zizakudla ziphundle du lalokho okuncinyane okwatshiywa yisiqhotho kanye lezihlahla zonke ezikhula egangeni.

6 Zizagcwala ezindlini zakho lezezikhulu zakho zonke lezamaGibhithe, into oyihlo labokhokho bakho abangazange bayibone kulokhu bahlala kulelilizwe kuze kube manje.’ ” Khonapho uMosi wabe efulathela esuka kuFaro.

7 Izikhulu zikaFaro zathi kuye, “Koze kube nini na indoda le ilokhu iyingozi kithi? Yekela abantu bahambe bayekhonza uJehova uNkulunkulu wabo. Ulokhu ungaboni yini ukuthi ilizwe leGibhithe selichithekile?”

8 UMosi lo-Aroni basebebuyiswa kuFaro. Wathi, “Hambani liyokhonza uJehova uNkulunkulu wenu. Kanti konje ngobani abahambayo?”

9 UMosi waphendula wathi, “Sizahamba labatsha labadala bethu; lamadodana lamadodakazi ethu, lemihlambi yethu ngoba kumele senzele uJehova umkhosi.” 10 UFaro wathi, “UJehova kabe lani, kumbe likhumbula ukuthi ngizaliyekela lihambe labesifazana labantwana! Kusobala ukuthi liqonde ukwenza okubi. 11 Hatshi! Akuhambe amadoda kuphela; amkhonze uJehova ngoba phela yikho ebelivele likukhalela.” Ngakho uMosi lo-Aroni basebexotshwa phambi kukaFaro.

12 UJehova wasesithi kuMosi, “Yelula isandla sakho phezu kweGibhithe ukuze kwehle isikhongwane, izintethe, kulo lonke ilizwe zidle zigugude konke okukhulayo emmangweni, konke lokho okwatshiywa yisiqhotho.” 13 UMosi wayiphakamisa intonga yakhe phezu kweGibhithe, uJehova wasequbula umoya wempumalanga wavunguza elizweni lonke ngalelolanga lobusuku bakhona. Ekuseni umoya waletha izintethe.

14 Zalihlasela lonke elaseGibhithe zagcwala silikici kuzo zonke izindawo zelizwe ngobunengi bazo. Kwakungakaze kube khona isikhongwane esingako njalo singeyikufa saba khona njalo lanini. 15 Intethe lezo zavala zahuqa umhlabathi waba mnyama bhuqe. Zatshaya zabhuqa konke okwakusele ngesikhathi sesiqhotho, konke lani okwakukhula emmangweni kanye lezithelo zezihlahla. Akusalanga lutho oluluhlaza ezihlahleni loba yizimila bani kulo lonke ilizwe laseGibhithe.

16 UFaro waphanga wabiza uMosi lo-Aroni wathi, “Ngonile kuJehova uNkulunkulu wenu lakini. 17 Manje-ke ngixolelani njalo libuye likhuleke kuJehova uNkulunkulu wenu ukuthi asuse loluhlupho olubhubhisayo.”

18 UMosi wasesuka kuFaro wayakhuleka kuJehova. 19 UJehova wasewuguqula umoya waphephetha uvelela entshonalanga ulamandla. Wazidudula izintethe wazitshovela eLwandle Olubomvu. Akusalanga ntethe layinye loba ngaphi eGibhithe.

20 Kodwa uJehova wayenza yaba lukhuni inhliziyo kaFaro, kaze abavumela abako-Israyeli ukuthi bahambe.

Uhlupho lomnyama

21 UJehova wasesithi kuMosi, “Yelulela isandla sakho emkhathini ukwenzela ukuthi umnyama wembese iGibhithe lonke – umnyama ophumputhekayo.”

22 Ngakho uMosi waseselulela emkhathini isandla sakhe kwathi gubu umnyama okhasa phansi walembesa lonke elaseGibhithe okwezinsuku ezintathu. 23 Kakho owayesabona omunye njalo kakho owayengasuka endaweni yakhe okwalezonsuku ezintathu. Kodwa ama-Israyeli ayelakho ukukhanya ezindaweni ayehlala kuzo.

24 UFaro wasebiza uMosi wathi, “Hambani liyokhonza uNkulunkulu. Ngitsho labesifazana benu labantwana hambani labo; litshiye kuphela imihlambi yezifuyo zenu.” 25 Kodwa uMosi wathi, “Kumele usivumele ukuthi siyokwenza imihlatshelo leminikelo yokutshiswa kuJehova uNkulunkulu wethu.

26 Izifuyo zethu lazo zimele zihambe lathi kungasali lasinye. Simele siyosebenzisa ezinye zazo ekukhonzeni uJehova uNkulunkulu wethu. Phela kasisoze sazi ukuthi sizasebenzisa siphi isifuyo ukukhonza uJehova size sifike khonale.”

27 Kodwa uJehova wayenza yaba lukhuni inhliziyo kaFaro, kaze afuna ukubayekela bahambe. 28 UFaro wathi kuMosi, “Suka phambi kwami! Phinde ngikubone futhi. Mhla wangibona futhi ufile wena.” 29 UMosi waphendula wathi, “Akube njengokuba usitsho. Phinde ungibone njalo lapha.”